Posts by Yop:

    Maliitang pagmimina sa Cordillera ipinahinto ni Secretary Cimatu

    September 22nd, 2018

    Ni Santiago Celario

    DENR Secretary Roy Cimatu. Photo © https://en.wikipedia.org

    IPINAGUTOS ni Department of Environment and Natural Resources Secretary Roy Cimatu sa Mines and Geosciences Bureau na muling repasuhin at i-validate ang lahat ng aplikasyon para sa pagtatayo ng People’s Small-Scale Mining Areas o “Minahang Bayan” sa bansa upang makatiyak na ang mga ito ay ligtas sa panganib.

    Ang kautusan ay ipinalabas ni Cimatu matapos magpahayag kamakailan si Pangulong Rodrigo Duterte na ibig niyang masara lahat ng minahan sa bansa kasunod ng trahedya na naganap sa isang minahan Itogon, Benguet dahil sa pagragasa ng bagyong Ompong. Hindi bababa sa 39 ang namatay sa landslide na naganap sa Minahang Bayan sa Ucab, Itogon.

    (Read More: http://beyonddeadlines.com/2018/09/20/duterte-wants-to-close-all-mining-after-philippines-landslides/)

    “We will be stricter in approving Minahang Bayan sites, and affirm whether they conform to standards that are safe especially for the miners,” ani Cimatu.

    Ayon kay Cimatu ibig niyang tiyakin ng MGB na ligtas ang mga tinutuluyan ng mga small-scale miners.

    “Their (small-scale miners) residences should be far enough from identified geohazard areas,” dagdag pa ni Cimatu.

    Ayon sa sangay ng MGB sa Cordillera Autonomous Region, 10 asosasyon ng mga “small-scale miners” ang nabigyan ng temporary mining contract sa Itogon, Benguet habang nakabitin pa ang pinal na deklarasyon sa kahihinatnan ng Minahang Bayan.

    Kaugnay nito ay ipinakansela ni Cimatu ang lahat ng mga temporary mining contracts na inisyu ng MGB sa bisa ng Executive Order (EO) 79 series of 2012. Hiniling din niya sa Armed Forces of the Philippines at Philippine National police na tulungan ang MGB sa pagpapahinto ng pagmimina sa Cordillera.

     

    BD Admin: You think your friends gonna like this piece? If you do, kindly share it. Thanks.

    No Comments "

    Apat patay sa barilan sa QC

    September 19th, 2018

    Ni Santiago Celario

    PATAY ang apat na lalaki, kabilang ang isang tiktik na sibilyan, sa magkahiwalay na insidente nang pakikipagbarilan ng mga pulis laban sa mga hinihinalang holdaper at tulak ng bawal na gamot nitong Martes ng madaling araw sa Quezon City.

    Kinilala ni Quezon City Police District (QCPD) Director, Police Chief Superintendent Joselito T Esquivel Jr., ang isa sa mga nasawi bilang si Christoper Blanca, 41, residente ng Batasan Hills. Samantala, hindi pa nakikilala ang kasama ni Blanca na tinatayang nasa mga 30 taong gulang, may taas na 5’3”, may maliit ang pangangatawan at kayumangging balat.

    Sinabi pa ni Esquivel na nakilala si Blanca sa pamamagitan ng isang Identification Card na natagpuan sa kanyang pag-iingat.

    Bukod sa ID, nakuha mula kay Blanca at kasama nito ang isang kalibre .38 na revolver at bala, isang .9mm na pistola at anim na bala, isang Honda Wave na motorsiklo, dalawang backpacks, mga gamit ng kanilang sinasabing hinoldap, cellphone at apat na sachet ng hinihinalang methamphetamine hydrochloride o shabu.

    Kasunod nito kinilala rin ng hepe ng QCPD ang dalawa pang nasawi sa pamamagitan lamang ng kanilang alyas na Gelo at Tom.

    Si Gelo ay sinasabing may edad na tinatayang mula 25 hanggang 30-anyos, at nasa 5’5” ang taas. Ito ay nakasuot ng kulay blue na t-shirt at short pants at may iba’t ibang tattoo sa iba-ibang bahagi ng kanyang katawan. Samantalang si Tom ay sinasabing isang sibilyang tiktik o asset ng mga awtoridad, dagdag pa ni Esquivel.

    Ayon sa ulat ng QCPD dakong alas 12:10 ng madaling araw, habang magkasabay na naglalakad sa kahabaan ng Kalayaan Avenue, malapit sa Elliptical Road sina Mauriel Anthony Villegas, 29; at Arjay Mortel, 20, ng bigla umanong dumating si Blanca at kasama nito sakay ng isang motorsiklo na walang plaka. Agad na bumaba ang back rider at hinoldap umano si Villegas at Mortel.

    Mabilis na tumakas ang mga holdaper papuntang Elliptical Road.

    Samantala, nakita naman ng mga biktima ang mga operatiba ng QCPD-District Special Operations Unit (DSOU) sa ilalim ni P/Superintendent Gil Torralba habang nagsasagawa ng anti-crime operations ang mga ito malapit sa lugar na pinangyarihan ng holdapan. Kaagad nilang iniulat ang nangyari sanhi para kumilos agad ang mga awtoridad at hinabol ang sinasabing mga holdaper.

    Nasukol ang mga ito sa kanto ng Alley 32 at Road 10, Proj. 6 kung saan imbes na sumuko ay mas minabuti pa ng mga ito na makipagbarilan sa mga pulis na nagresulta sa kanilang kamatayan.

    Ayon sa mga imbestigador ay nagawa pang itakbo sa East Avenue Medical Center ang isa sa mga suspek subalit hindi na ito umabot pa sa pagamutan ng buhay.

    Samantala, mga bandang 1:45 ng umaga ng makipagbarilan umano si Gelo sa mga miyembro ng QCPD Station 3 (Talipapa)-Drug Enforcement Unit sa loob ng Doña Josefa ll Subdivision, Brgy. Culiat, habang nagsasagawa ang mga ito ng buy-bust operation. Napatay din sa operasyon ang sibilyang tiktik ng mga pulis matapos itong unang paputukan ni Gelo habang umaaktong mamimili ng bawal na gamot.

    Nakuha mula kay Gelo ang isang cal. .9mm na pistola, anim na bala at apat na sachets ng hinihinalang shabu.

     

    BD Admin: You think your friends gonna like this piece? If you do, kindly share it. Thanks.

    No Comments "

    Dalagita nagpakamatay sa QC

    September 15th, 2018

    Ni Santiago Celario

    Image by education.medicaldialogues.in

    NAGPATIWAKAL ang isang 17-anyos na dalagita sa pamamagitan ng pagbigti sa loob ng kanilang tahanan sa Quezon City nitong nagdaang Huwebes.

    Kinilala ni Police Officer 3 Jerome Dollente, imbestigador ng Criminal Investigation and Detection Unit – Quezon City Police District (CIDU-QCPD), ang biktima sa pangalang Vanessa, isang residente ng Brgy. Bagong Silangan.

    Batay sa pahayag ng ina ng biktima, dakong alas-2 ng hapon nitong Huwebes ay umakyat umano siya sa ikalawang palapag ng kanilang tahanan upang kunin ang mga pinatuyong sinampay. Subalit nang mapadaan umano siya sa silid ng kanyang anak ay tila nakaramdam siya ng kaba kaya kinatok niya ang pintuan ng kuwarto nito.

    Pero halos ilang minuto na umano niyang kinakatok ang pinto ng silid ng anak ay hindi pa rin ito nagbubukas kaya tinawag niya ang asawa at puwershan nilang sinira ang seradura ng pintuan.

    Nang mabuksan ang pintuan ay napasigaw at napaiyak ang mag-asawa ng bumungad sa kanila ang nakabiting anak sa kisame.

    Agad nilang tinanggal sa pagkakabigti sa kisame ang anak at dahan-dahang inilatag ang katawan nito sa kanyang kama bago itinawag ang pangyayari sa himpilan ng QCPD Police Station 6 (Batasan).

    Hindi pa malaman ang dahilan ng pagbibigti ng biktima habang isinusulat ang ulat na ito.

     

    BD Admin: You think your friends gonna like this piece? If you do, kindly share it. Thanks.

    No Comments "

    DILG pinaghahanda ang mga lokal na pamahalaan para sa papalapit na Super Typhoon

    September 12th, 2018

    Ni Santiago Celario

    INATASAN nitong Martes ni Interior and Local Government Officer-in-Charge Eduardo Año ang lahat ng mga lokal na pinuno sa mga lugar na direktang maapektuhan ng papalapit na bagyo na maghanda na upang hanggat maari ay magkaroon ng “zero casualty.”

    “Dapat lagi tayong handa. Dito ay dapat na ipakita ninyo ang inyong liderato,” hamon ni Año sa mga pinunong bayan.

    Kaugnay nito ay nanawagan ang Philippine Atmospheric Geophysical and Astronomical Services Administration sa publiko na huwag magpanik sa kabila ng kumakalat na ulat sa social media na ang bagyo ay isang “super typhoon.”

    Tinatayang papasok sa area of responsibility ng bansa ang bagyong si Ompong, na may pandaigdigang pangalang Mangkhut, ngayong Miyerkoles.

    Ayon sa ulat, ang naturang bagyo ay inaasahang tatahakin ang hilagang bahagi ng bansa.

    Samantala, ayon kay Año nakatakda ngayon na magpulong ang National Disaster Risk Reduction Management Council (NDRRMC) kaugnay sa paparating na bagyo.

     

    BD Admin: You think your friends gonna like this piece? If you do, kindly share it. Thanks.

     

    No Comments "

    DOJ nanindigan na legal ang aksyon ng pamahalaan laban kay Sen. Trillanes

    September 10th, 2018

    Ni Santiago Celario

    (File photo) Senator Antonio Trillanes © INQUIRER PHOTO/JOAN BONDOC

    NANINDIGAN nitong Biyernes si Department of Justice Secretary Menard I. Guevarra na legal ang pagbawi ni Pangulong Rodrigo Duterte sa amnesty na ibinigay ng pamahalaan kay Senador Antonio Trillanes IV.

    Ipinaliwanag ni Guevarra na dahil walang inamin si Trillanes na kasalanan, bilang isa sa kondisyon na kailangan para sa pagbibigay ng amnesty, ay walang saysay ang amnesty na ibinigay dito noong 2010 ng nagdaang administrasyon.

    “Paano magbibigay ng kapatawaran kung unang-una ay di mo naman inamin na meron kang ginawang kasalanan?” tanong ni Guevarra habang ginaganap ang 52nd anniversary ng National Police Commission (NAPOLCOM) sa punong tanggapan nito sa DILG Building sa Edsa, Quezon City.

    Sinabi pa ni Guevarra, na itinalagang tagapangalaga ng pamahalaan ni Duterte habang siya ay nasa Gitnang Silangan, na ang kanilang aplikasyon para sa isang “alias warrant” at “Hold Departure Order” sa sala ni Makati Regional Trial Court Branch 148 Judge Andres Soriano ay isa sa mga epekto ng pagpapawalang bisa ng Pangulo sa amnestiya ni Trillanes sa pamamagitan ng Presidential Proclamation Number 572.

    Idinagdag pa ng secretary na hindi na siya puwedeng magkomento sa mga usapin ng pagkakasuspindi sa amnestiya ni Senador Trillanes dahil nasa korte na ito.

    “Hindi na ko puwedeng mag-komento dyan kasi ang mga bagay na yan ay naiakyat na nya (Sen. Trillanes) sa Supreme Court at tama naman yun” ani pa ni Guevarra.

    Dahil sa pagbawi ng amnestiya, si Trillanes ay maaring arestuhin ng mga tauhan ng Philippine National Police ano mang sandali, isang bagay na mariing kinondena ng mga human rights advocates dahil malinaw umano na ang ginagawa ni Duterte ay sinusupil ang lahat ng tumututol sa kanyang umano ay mali at anti-demokratikong pamamalakad ng pamahalaan.

     

    BD Admin: You think your friends gonna like this piece? If you do, kindly share it. Thanks.

    No Comments "

    Bagong Quezon City Jail itatayo sa Payatas

    September 7th, 2018

    Ni Santiago Celario

    Sleeping inmates of the crowded Quezon City Jail. Image © getrealphilippines.com

    PINANGUNAHAN nitong Huwebes ni Quezon City Mayor Herbert Bautista at mga opisyal ng Bureau of Jail Management and Penology ang groundbreaking ng itatayong Quezon City Jail.

    Ayon kay QCJ Warden Superintendent Ermilito Moral, layunin ng pagtatayo ng bagong city jail na maiwasan ang patuloy na pagsisikip sa kasalukuyang QCJ sa Edsa-Kamuning. Ang nasabing lumang pasilidad ay para lamang sa 800 detainee subalit sa kasalukuyan ay mayroong mahigit sa 3,800 detenido ang nakapiit dito.

    Ang bagong QCJ ay itatayo sa kahabaan ng Payatas Road sa Barangay Bagong Silangan 2. Ang lupang pagtatayuan nito ay bahagi ng 3.4 na ektaryang lupa na binili ng pamahalaang panglungsod mula M.S. Florendo and Sons. Inc. noong 2015.

    Maliban sa bagong QCJ ay tatayuan din ng jail officers quarters, police station, fire station at barangay health center ang naturang piraso ng lupain.

    Sinabi ni Supt. Moral ang itatayong bagong jail facility ay ang kauna-unahang pinakamalaking pasilidad para sa mga ng mga detainee.

    This will solve the congestion that sometimes causes riots and diseases ani pa ni Moral.

    BD Admin: You think your friends gonna like this piece? If you do, kindly share it. Thanks.

    No Comments "

    Walang krisis sa bigas – NFA

    September 5th, 2018

    Ni Santiago Celario

    (File Photo) National Food Authority Image © philstar.com

    MATAPOS ipanawagan ng ilang sektor ng lipunan ang pagbuwag sa National Food Authority ay tiniyak nito na walang kakapusan ng bigas sa bansa.

    Ipinalabas ang pahayag nitong Martes matapos aprubahan ng NFA Council ang agarang importasyon nang 133,500 metriko toneladang bigas para sa Zamboanga, Basilan, Sulu at Tawi-Tawi o ZAMBASULTA.

    Sinabi pa ng NFA na ang agarang importasyon ay para matugunan ang nararanasang mataas na presyo ng bigas ng taong bayan sa ZAMBASULTA.

    Ayon sa NFA Council, ang Terms of Reference (TOR) para sa dagdag na importasyon ng bigas ay nakatakdang ilathala sa mga pahayagan ngayong Miyerkules.

    Idinagdag pa ng NFA ang delivery para sa unang 33,500 metriko toneladang ng bigas ay nakatakda mula sa Septiyembre 15 hanggang 30.

    Samantala, ang nalalabing 100,000 metriko toneladang bigas ay nakatakda namang dumating sa pagitan ng Oktubre 1 at Nobyembre 30.

    Kaugnay nito ang NFA ay nakatakdang ilipat ang kanilang imbak na bigas mula sa mga kalapit na rehiyon ng ZAMBASULTA para mabigyan na ang mga mamimili sa mga nasabing lalawigan ng alternatibong suplay ng dekalidad subalit murang bigas.

    Mabibili ang bigas ito sa halagang PhP27 bawat kilo, dagdag pa ng NFA.

     

    BD Admin: You think your friends gonna like this piece? If you do, kindly share it. Thanks.

    No Comments "

    DENR suportado ang pagbabawal ng paggamit ng plastic sa Boracay

    September 2nd, 2018

    Ni Santiago Celario

    PARA maprotektahan ang kalikasan, nagpahayag nitong araw ng Linggo ng suporta ang Department of Environment and Natural Resources (DENR) sa ang ginawang pagbabawal ng lokal na pamahalaan sa paggamit ng disposable na plastic sa isla ng Boracay.

    Ayon sa isang pahayag, suportado ng DENR ang inisyatiba ng Pamahalaang Bayan ng Malay sa lalawigan ng Aklan na ipasa ang Municipal Ordinance No. 386, Series of 2018 na nagbabawal sa paggamit ng single-use o disposable plastic sa mga hotels, resorts, restaurant at establisyemento sa Boracay at mga kalapit na lugar.

    Sinabi ni Undersecretary for Solid Waste Management and LGU Concerns Benny Antiporda na ang ordinansa ay isang welcome na hakbang ng bayan Malay. Ito, ani ni Antiporda, ay tiyak na makatutulong sa ginagawa ng pamahalaan na irehabilita ang Boracay.

    Matatandaang isinara ang Boracay sa loob ng anim na buwan upang malinis ang polusyon dito. Mananatiling sarado ang pamosong isla hanggang sa Oktubre 26.

    Magugunitang rin na nauna ng ipinagbawal ni DENR Secretary Roy A. Cimatu ang paggamit ng plastic upang masugpo o mabawasan ang problema ng basura sa Boracay.

    We commend the LGU of Malay for heeding the Secretary’s call by coming up with such ordinance,” Antiporda said. “Single-use plastics, particularly those used in packaging, have been identified as a contributing factor to Boracay’s mounting waste problem, not only on land but in surrounding waters.” diin ni Antiporda.

    Kaugnay nito sinabi ni Antiporda na ang pagbabawal sa paggamit ng plastic ay isang malaking hakbang para labanan ang plastic pollution at ang toxic impact nito sa tao, hayop, katubigan, karagatan at sa kalikasan.

    The DENR is willing to provide Malay with any assistance in the implementation of this ban and all its other programs to manage solid waste,” dagdag pa ni Antiporda.

    Malay can become a model not only for Aklan or the entire island of Panay but also to other LGUs with ecotourism sites,” sabi pa ni Antiporda.

    Kabilang sa mga ipinagbabawal sa Boracay ay ang mga disposable toothbrush, toothpaste tubes, shaving razors, shower caps, sachets of shampoo o conditioner, liquid body soaps, suklay, bottled water, straws, kutsara, tinidor, kutsilyo at sachets ng coffee, sugar at creamer.

    Ang mga lalabag sa naturang ordinansa ay bibigyan ng babala at pagmumultahin ng PhP2,000 sa unang paglabag, confiscation ng single-use plastic at multa ng PhP2,500 para sa ikalawang paglabag at cancellation ng business permit para sa ikatlong paglabag.

    BD Admin: You think your friends gonna like this piece? If you do, kindly share it. Thanks.

     

    No Comments "

    Dalawang pinaghihinalaang rapists patay sa enkuwentro sa QC

    August 31st, 2018

    Ni Santiago Celario

    Image by tnt.abante.com.ph

    NAPATAY ang dalawang pinaghihinalaang manggagahasa at tulak ng bawal na gamot matapos makipag barilan umano ang mga ito sa mga awtoridad sa Quezon city nitong nagdaang Miyerkoles ng gabi.

    Hindi pa nakikilala ang mga napatay pero sinabi ni Superintendent Joel Villanueva, hepe ng Quezon City Police District Station 6 (Batasan Hills) na ang isa sa mga ito ay nasa pagitan ng 30 hanggang 45 anyos, katamtaman ang pangangatawan, nakasuot ng itim na t-shirt at short, maroon na bonnet, itim na helmet at burdado ito ng mga tattoo na Bahala na Gang at Bukol Jun Jun sa kaliwang tuhod.

    Ang ikalawa naman, ayon kay Villanueva, ay nasa pagitan ng 25 hanggang 30 anyos, katamtaman ang pangangatawan, nakasuot ng puting t-shirt, itim na jacket at sombrero, at naka face mask.

    Batay sa ulat ng mga awtoridad, mga dakong 11:30 ng gabi habang nagmamanman sa checkpoint ang mga tauhan ng QCPD Station 6 sa kanto ng Payatas Road at Molave Street, Brgy. Payatas B, isang concerned citizen ang lumapit sa kanila at nagsabing isang Anabel Cabatbat, 18, na taga Barangay Commonwealth ang dinukot nang dalawang hindi pa kilalang lalaki sa kanto ng Majaas Street at Payatas Road.

    Dahil dito ay agad tumugon ang mga operatiba ng Station 6 at pagdating sa lugar na sinabi ng impormante ay natagpuan nila ang sinasabing dinukot na umiiyak at walang suot na damit sa kalahati ng kanyang katawan. Agad na humingi ng tulong ang biktima matapos nitong matanawan ang mga pulis.

    Sa puntong ito ay naispatan din ng mga pulis sa di kalayuan ang dalawang pinaghihinalaang rapist ng biktima at tinangka nila itong pasukuin. Gayun man, imbes na sumuko ay pinaputukan ng mga suspek ang mga awtoridad dahilan para mapilitan ang mga ito na gumanti ng putok.

    Matapos ang ilang sandaling palitan ng mga putok ay humandusay ang mga suspek sa daan na wala ng buhay.

    Narekober ng Scene of the Crime Operatives (SOCO) ng QCPD sa lugar na pinangyarihan ng enkuwentro ng dalawang snub nose na .38 caliber na revolver, bala at walong sachet ng pinaghihinalaang methamphetamine hydrochloride o shabu.

     

    BD Admin: You think your friends gonna like this piece? If you do, kindly share it. Thanks.

    No Comments "

    Pulis patay sa ambus sa QC

    August 29th, 2018

    ISANG miyembro ng Philippine National Police ang pinatay nang isang hindi pa nakikilalang mamamatay tao nitong Martes ng hapon sa Quezon City.

    Kinilala ang biktima na si Police Officer 3 Nepthalie Buensuceso, 35, operatiba ng PNP-Criminal Investigation and Detection Group (CIDG) at naninirahan sa Caloocan City. Siya ay agad na namatay matapos magtamo ng maraming tama ng bala mula sa hindi pa malamang kalibre ng baril.

    Ayon kay Senior Inspector Elmer Monsalve, hepe ng Quezon City Police District – Criminal Investigation and Detection Unit (QCPD-CIDU), naganap ang pagpatay sa biktima bago mag-ala sais ng hapon sa kanto ng N. Domingo at Broadway Streets, Barangay, Valencia.

    Ayon sa mga saksi, sakay ang biktima ng kanyang motorsiklo nang huminto ito sa intersection ng N. Domingo at Broadway dahil sa stoplight. Sinabi pa ng mga nakakita na habang naghihintay ng green light ay dumikit dito ang isa pang naka-motor na walang plaka at walang sabi-sabing pinagbabaril ang biktima.

    Tumakas ang salarin, na naka jacket na kulay maroon, itim na helmet at sakay ng Yamaha Mio na motorsiklo; matapos bumagsak ang biktima na duguan, dagdag pa ng mga saksi.

    Sa kasalukuyan ay nagsasagawa ng masusing imbestigasyon ang mga tauhan ng QCPD-CIDU para matuntun kung sino ang nasa likod ng pananambang.

     

    BD Admin: You think your friends gonna like this piece? If you do, kindly share it. Thanks.

    No Comments "

    Punong tanggapan ng Land Transportation Office sa QC tinangkang looban

    August 27th, 2018

    Ni Santiago Celario

    TINANGKANG pagnakawan ng mga hindi pa nakikilalang kawatan ang tanggapang sentral ng Land Transportation Office sa Quezon City nitong nagdaang katapusan ng linggo o weekend.

    Ayon sa ulat ng Quezon City Police District Public Information Office nadiskubre ang panloloob sa tanggapan ng LTO Central Office sa kahabaan ng East Avenue, Barangay Pinyahan dakong 7:00 ng umaga. Partikular na nilooban ang opisina ng LTO-Law Enforcement Service (LES) na nasa ikalawang palapag ng gusaling LETAA sa loob ng LTO compound.

    Nabatid mula sa pulisya na isang encoder ng LTO, na nakilalang si Sherwin Leal, 39; ang nag report ng insidente sa pulisya.

    Ayon pa sa mga awtoridad, hinalungkat ng mga kawatan ang mga drawers ng LES kung saan nakalagay ang mga papeles ng Data Control Unit, Custodial Unit at Investigation Section of the Intelligence and Investigation Division.

    Gayunman, dagdag pa ng mga imbestigador, wala umanong nawala sa drawer ng LES. Sinabi pa nila na sa air condition vent dumaan ang mga nagtangkang magnakaw sa tanggapan ng LES.

    Sa kasalukuyan ay patuloy pa rin ang ginagawang pagiimbestiga ng mga tauhan ng QCPD Scene of the Crime Operatives (SOCO) at Criminal Investigation and Detection Unit (CIDU).

    Samantala, tatlong construction workers mula sa isang itinatayong gusali malapit sa LTO ang inimbitahan ng mga awtoridad upang magbigay linaw sa mga kaganapan sa LTO. Gayun man, nilinaw nila na hindi mga suspek ang mga ito.

     

    BD Admin: You think your friends gonna like this story/opinion? If you do, kindly share it. Thanks.

    No Comments "

    DENR nanawagan sa publiko na maging mapagmatyag sa panahon ng malakas na pag ulan

    August 26th, 2018

    Ni Santiago Celario

    DENR Secretary Roy Cimatu. Photo © https://en.wikipedia.org

    NANAWAGAN SI Department of Environment and Natural Resources Secretary Roy Cimatu sa mga residente na nanirahan sa mga geohazard-prone areas na maging mapagbantay at mag-ingat laban sa posibleng landslides at flash floods sa panahon ng malakas na ulan upang maiwasan ang sakuna.

    Residents and communities near mountains and within low-lying areas should be proactive by taking appropriate measures to minimize, if not prevent, any adverse impact of calamities,” mariing panawagan ni Cimatu.

    Ginawa ng kalihim na manawagan dahil sa malalakas na ulan na sumalpok sa Metro Manila dala ng Hanging Habagat o Southwest Monsoon. Ang ulan ay nagdala ng baha sa Metro Manila at landslides sa mga karatig na probinsya dahilan upang tatlong tao ang mamatay at halos 50,000 naman ang ilikas sa mga ligtas na lugar.

    The best way to prevent loss of lives and damage to properties during floods and landslides is for people to take precautionary measures,” ani pa ni Cimatu.

    Kaugnay nito ay inatasan ng DENR ang Mines and Geosciences Bureau (MGB) na palagiang magbigay ng mga tips at safety instructions sa panahon ng ulan upang maiwasan ang trahedya.

    Ayon kay MGD Lands Geological Survey Division Officer-in-Charge Antonio Apostol, dapat maging mapagbantay ang mga residente sa mga bumabagsak na puno, bakod at iba pang senyales ng pagguho ng lupa o landslides.

    There are also other signs such as forms of water being blurred with soil and a loud resonance signifying a landslide coming,” ani pa ni Apostol.

    Nakiusap din si Apostol ibang sangay ng pamahalaan na bantayan at ikalat ang mga ipalalabas na advisory ng DENR-MGB.

     

    BD Admin: You think your friends gonna be interested in this piece? If you do, kindly share it. Thanks.

    No Comments "

    Mahigit sa 36 na milyong tao sa Southeast Asia namumuhay na mas mahirap sa mahirap

    August 26th, 2018

    Ni Santiago Celario

    Image © youtube.com

    TINATAYANG aabot sa 36 milyong tao mula sa Southeast Asia ang namumuhay sa ilalim ng tinatawag na poverty line, at 90% mula sa bilang na ito ay galing Pilipinas at Indonesia.

    Ito ang nabatid sa mula isang ulat ng United Nations na pinamagatang “The 2017 ASEAN-China-UNDP Report on Financing the Sustainable Development Goals (SDGs) sa ASEAN” na tinalakay sa isang pulong ng ASEAN kamakailan.

    Hindi rin halos nalayo sa ulat ng UN ang isa namang lumabas na pag-aaral na ginawa naman ng Philippine Institute for Development Studies (PIDS).

    Ayon sa PIDS halos kalahati ng populasyon sa Pilipinas ay nanganganib na maging mahirap dahil umano sa matinding dagok sa labor at employment ng mga karaniwang tao, mataas na presyo ng mga bilihin at mga demographic factors.

    Sinabi pa ng PIDS na dahil sa pagtatayang ito kaya patuloy na binibigyan pansin ng ASEAN community ang development gaps ng mga miyembrong bansa. Patuloy din ang paghahatag ng ASEAN ng mga bagong roadmap patungo sa pagkakamit ng tinatawag na Sustainable Development Goals (SDGs).

    Para talakayin ang susunod na hakbang kaugnay ang SDGs sa regional at sub-national levels, ang ASEAN Secretariat, sa pakikipagtulungan ng China at United Nations Development Programme (UNDP) at ng Ministry of Foreign Affairs at International Cooperation ng Cambodia, ay nagdaos ng ASEAN-China-UNDP Symposium on Localising Sustainable Developmen Goals (SDGs) at Realising Poverty Eradication noong ika-20 hanggang 21 ng Augusto sa Siem Reap, Cambodia.

    Nahatag ng 17 SGD target sa symposium na ito para magsilbi ring panawagan sa mundo na tapusin na ang kahirapan at pangalagaan ang ating planeta upang matiyak na ang lahat ay magtatamasa ng kapayapaan at karangyaan.

     

    BD Admin: You think your friends gonna be interested in this piece? If you do, kindly share it. Thanks.

    No Comments "

    Isa sa tatlong holdaper todas sa mga pulis Kyusee

    August 22nd, 2018

    Ni Santiago Celario

    NAPATAY ang isa sa tatlong pinaghihinalaang holdaper matapos umano itong makipagbarilan sa mga tumutugis na pulisya sa Quezon City nitong Miyerkoles ng madaling araw.

    Hindi pa nakikilala ang napatay hanggang sa mga sandaling ito bagamat inilarawan ng mga awtoridad na ito ay nasa 40 hanggang 45 anyos ang edad, maganda ang pangangatawan, mga 5’7” ang taas, may mga tatong “Bat” sa kanang balikat at “Tribal” sa kanang pulso. Bukod dito ay nakasuot ng puting shorts at t-shirt ang napatay.

    Ayon kay P/Supt. Rossel Cejas, hepe ng Quezon City Police District (QCPD) Station 4 (Novaliches), naganap ang insidente ilang sandali makalagpas ang hatinggabi sa harap ng GSN Laboratory sa kahabaan ng Reliance Street, Barangay Nagkaisang Nayon, Novaliches. Sinabi niya na bago maganap ang barilan ay humingi ng tulong sa kanila si Edgardo Sugayan Montinola Jr., isang taxi driver at residente ng Meycauayan, Bulacan.

    Bukod sa hinoldap ay tinangay pa ng tatlong holdaper ang taxi ni Montinola, paliwanag ni Cejas.

    Agad namang nagsagawa ng follow-up operation ang mga taga-Station 4 at naglatag ang mga ito ng checkpoint sa pag-asang masasabat nila ang ninakaw na taxi cab. Hindi nga nagtagal at naispatan ang kinarnap na taxi at tinangka nilang parahin ito.

    “Pero sa halip na huminto ay pinaharurot ng driver nito ang taxi kaya hinabol ito ng mga tauhan ko at nagkaroon ng ‘running gun battle,’” dagdag ni Cejas.

    Napatay ang isa sa mga holdaper habang nakatakas naman ang dalawang kasamahan nito.

    Maliban sa taxi cab, nabawi mula sa napatay ang PhP700 na hinoldap mula kay Montinola, ang isang kalibre .38 na revolver; mga basyo ng 9 mm na pistola at limang sachet ng hinihinalang shabu sa lugar na pinangyarihan ng barilan.

    Positibo ring kinilala ni Montinola ang napatay bilang isa sa tatlong humoldap sa kanya at tumangay ng kanyang minamanehong taxi.

    Sa kasalukuyan ay patuloy pa ring pinaghahanap ng pulisya ang dalawang kasama ng napatay.

     

    BD Admin: You think your friends gonna like this piece? If you do, kindly share it. Thanks.

    No Comments "

    Isinumpang selda ng pulisya?

    August 20th, 2018

    Ni Santiago Celario

    Image © kotaku.com.au

    MULI na namang may nagbuwis ng buhay sa “tila-isinumpang” selda ng Quezon City Police District Station 4 (Novaliches) matapos may mamatay na namang detainee dito nitong Lunes ng umaga.

    Kinilala ng mga awtoridad ang nasawi bilang si Ariel Gutierrez Salandana, 52, vendor at residente ng Geronimo compound, Barangay Sta. Monica, Novaliches, QC.

    Ayon sa nakasaksi sa pangyayari at kapwa detainee ni Salandana na si Roper Navarro, katatapos lamang maligo ng namatay mga bandang 5:10 ng umaga ng bigla itong manginig at lumugmok sa kinatatayuan.

    Sinabi ng pulisya na tinawag ni Navarro ang duty jailer na agad namang kumilos. Dinala si Salandana sa kalapit na Novaliches District Hospital subalit, ayon sa mga doktor ng pagamutan, hindi na ito umabot pa ng buhay.

    Samantala, tumanggi namang paimbestigahan pa ng anak ni Salandana na si Maybel ang kanyang pagkamatay. Ayon kay Maybel, noon pa mang 50-anyos lamang ito ay mayroon na itong hypertension.

    Namatay si Salandana halos dalawang buwan matapos mamatay rin ang isang Genesis Agoncillo sa loob din ng nasabing selda. Bigla na lamang umanong hindi nakahinga si Agoncillo at binawian ito ng buhay.

    Napag-alaman pa ng Beyond Deadlines na bukod kay Salandana at Agoncillo ay may apat pa na mga detainee ang namatay din sa loob ng nasabing selda matapos manikip ang kanilang mga dibdib, na tila ba parang may sumakal sa kanila.

     

    BD Admin: You think your friends gonna like this piece? If you do, kindly share it. Thanks.

    No Comments "

    Tulak ng party drug tiklo sa QC

    August 15th, 2018

    Ni Santiago Celario

    KULANG-kulang isang milyong pisong halaga ng umano ay party drugs ang sinaklot nitong Martes ng madaling araw sa Quezon City ng mga ahente ng Philippine Drug Enforcement Agency mula sa umano ay isang tulak ng bawal na gamot.

    Kinilala ang dinakip bilang si Bruce Carlo Vidal Santos alyas Elmo at residente ng 38 M. L. Quezon St. Bagungbayan, Taguig City. Nasamsam mula sa kanya ang 330 piraso ng tableta at 40 kapsula na hinihinalang ecstacy na may halagang umaabot sa PhP777,000.00 at siyam (9) na bote na tig-1.1 ml ang laki, na puno ng likido na hinihinala ring ecstacy. Ito ay tinatayang may halagang PhP165,000.00.

    Sa kabuuan ay umaabot sa PhP942,000.00 ang halaga ng nakumpiskang umano ay party drugs mula kay Santos.

    Sinabi ng PDEA na ikinasa ang drug buy bust operation laban sa suspek dakong alas 2:20 madaling araw sa Mother Ignacia Avenue, Quezon City. Idinagdag pa ng ahensya na posibleng na ka-grupo umano ng suspek ang kamakailan ay nahuling pinaghihinalaang tulak din ng party drugs.

    Nakapiit ngayon si Santos at nahaharap sa kasong paglabag ng Republic Act 9165 o Comprehensive Dangerous Drug Act of 2002.

     

    BD Admin: You think your friends gonna like this piece? If you do, kindly share it. Thanks.

    No Comments "

    Pulis dinakip ang isang umano ay nagpupulis-pulisan sa QC

    August 8th, 2018

    Ni Santiago Celario

    QCPD Director Chief Supt. Joselito Esquivel Jr.

    SUWAK sa kulungan ang isang sexagenarian matapos itong hulihin ng mga tauhan ng Quezon City Police District dahil sa illegal na pag-iingat ng baril at usurpation of authority nitong nagdaang araw ng Sabado.

    Ayon kay QCPD Director Chief Superintendent Joselito T Esquivel Jr., dakong 11 ng umaga ng kinompronta ni Pacifico Leoquinco, 65 at residente ng Malabon City; ang isang jeepney driver na umano ay lumabag sa batas trapiko sa kanto ng V. Luna Avenue Extension at Anonas Street.

    Habang armado ng isang baril, hiningi umano ni Tatang ang lisensya ng driver subalit isang bystander ang lumapit sa dalawa at hiningian naman ng mission order ang suspek kaugnay sa baril na nakasukbit sa baywang nito, pahayag ni Esquivel.

    Ikinagalit umano ni Tatang ang panghihimasok ng bystander kasabay nang pagpapakilala nito na siya ay isang “pulis,” dahilan para tumawag ng mga tunay na pulis ang bystander mula sa kalapit na Anonas Police Station.

    Agad na dumating ang mga rumespondeng alagad ng batas at hiniginan ng identification card si Tatang at ng wala itong maipakita ay agad itong dinala sa himpilan ng pulisya kung saan siya ngayon ay nakapiit.

    Bukod sa usurpation of authority, nahaharap din sa kasong paglabag sa Republic Act 10591 (Comprehensive Firearms and Ammunition Regulation Act) si Tatang.

     

    BD Admin: You think your friends gonna like this piece? If you do, kindly share it. Thanks.

    No Comments "

    QC magdedevelop ng mga soccer players

    August 5th, 2018

    Ni Santiago Celario

    Photo © Cofi Nuguid via Flickr | Manila Bulletin

    BIBIGYANG halaga at pasisiglahin ng Quezon City government sa pamumuno ni Mayor Herbert Bautista ang pamoso sa buong daigdig na larong soccer para mahalina ang kabataan sa paligsahang ito at maipakita sa mundo ang kanilang galing sa naturang isports.

    Ayon kay QC Vice Mayor Josefina “Joy” Belmonte-Alimurong, matagal na panahon na hindi nabibigyan ng prioridad ang soccer kaya naman maliit na porsyento lamang na mga manlalaro nito ang nadedevelop ng lungsod.

    Tiniyak ni Belmonte-Alimurong na bibigyan ng tulong para makapagsanay ang mga ibig mag-soccer at nang makasama ang mga ito sa mga pandaigdigang kumpitensya. Kabilang sa tulong na ibibigay ay pananalapi.

    “Hindi lamang moral ang tulong namin dito kundi kami ay nagbibigay ng financial assistance sa mga manlalaro upang sila ay makapag training at higit na ma develop ang kanilang galing sa paglalaro ng soccer” diin ni Belmonte.

    “Dahil wala football facilities sa QC, naglaan po ang Sangguniang Panlunsod ng PhP800 milyon para sa Bautista Sports Arena na itatayo sa aayusing Amoranto Complex, at inaasahan ko po na dito ay magkakaroon ng football area para sa ating mga manlalaro” dagdag ni Belmonte.

    Samantala, sinabi naman ni Dan Palami, manager ng team Askals, na siya ay umaasa na sa mga darating na panahon ay hindi na dedepende ang grupo sa pagkuha ng mga soccer player mula sa ibang bansa bagkus ay dedepende na ito sa mga Pilipinong manlalaro na mula sa ating bansa.

    Aniya, patuloy ang paghahanap nila ng mga kabataang nais maglaro ng soccer para maidagdag sa bilang ng mga kasalukuyang manlalaro nito sa QC at Lungsod ng Valenzuela.

    Samantala, napagalaman na magkasama na ngayon ang mga lokal na pamahalaan ng QC at Valenzuela sa paghahanap at pagsasanay ng mga kabataang manlalaro ng soccer na sasali sa mga oandaigdigang kumpetisyon.

     

    BD Admin: You think your friends gonna like this piece? If you do, kindly share it. Thanks.

    No Comments "

    Kampanya laban sa mga lumalabag sa mga ordinansa ng QC patuloy

    August 4th, 2018

    Ni Santiago Celario

    PATULOY ang maigting na kampanya ng Quezon City Police District laban sa lumalabag sa mga ordinansa ng lungsod.

    Ito ang napagalaman matapos ipahayag ng mga awtoridad na mahigit sa dalawang laksa ang kanilang hinuli sa iba’t ibang lugar sa QC nitong Sabado ng madaling araw dahil sa paglabag sa mga batas ng lungsod.

    Ayon kay QCPD Director Police Chief Superintendent Joselito T Esquivel Jr. umabot sa 2,200 ang bilang ng mga hinuli. Ang mga ito ay hinuli dahil sa paglalakad ng walang pang-itaas, pagiinom sa kalye, jaywalking, illegal barking para sa mga pasahero, pagihi sa daan, paninigarilyo sa pampublikong lugar, paglabag sa curfew hours para sa mga menor de edad, at mga traffic code violations.

    Nito lamang araw ng Huwebes ay umabot sa 1,087 ang hinuli sa QC dahil sa mga kaparehas na paglabag sa batas. (Basahin pa: http://beyonddeadlines.com/wp-admin/post-new.php)

    Kaugnay nito ay nanawagan muli si Esquivel sa mamamayan na huwag ipagwalang bahala ang mga ordinansa ng QC. Sinabi niya na mahigpit ang pagpapatupad sa mga batas ng lungsod upang magkaroon ng disiplina at maging maayos ang mga pamayanan.

    Kadalasan ay pinagmumulta, pinagpupush-up sa pampublikong lugar o pinag-cocommunity service ang mga lumalabag sa ordinansa ng QC. Subalit yung paulit-ulit na lumalabag sa ipinipiit sa bilangguan.

     

    BD Admin: You think your friends gonna like this piece? If you do, kindly share it. Thanks.

    No Comments "

    Isang laksang lumabag sa mga ordinansa dinakip ng pulisya

    August 2nd, 2018

    Ni Santiago Celario

    QCPD Director Chief Supt. Joselito Esquivel Jr.

    NANAWAGAN nitong Huwebes hapon ang pamunuan ng Quezon City Police District sa mga mamamayan na huwag ipagwalang bahala ang mga ordinansa ng lungsod.

    Ginawa ng QCPD ang panawagan matapos nitong iulat sa mga mamamahayag na mahigit sa 1,000 tao ang dinakip nito lamang Huwebes ng madaling sa iba’t ibang bahagi ng QC dahil sa paglabag sa sari-saring ordinansa.

    Ayon kay QCPD Director Chief Superintendent Joselito T Esquivel Jr. umabot sa 1,087 na tao ang nahuli ng kanyang mga tauhan, kabilang ang 34 na menor de edad, matapos lumabag ang mga ito sa mga ordinansa ng lungsod.

    Sinabi pa ni Eleazar na apat ang hinuli dahil sa paglalakad nang nakahubad ang pangitaas, 831 dahil sa jaywalking, 170 dahil sa paninigarilyo sa pampublikong lugar, 34 dahil sa paglabag sa oras ng curfew, 17 dahil sa pagiinom sa kalye, at 31 dahil sa pagkakalat ng basura.

    Mahigpit na ipinatutupad ng QCPD ang mga ordinansa upang magkaroon ng disiplina ang mga mamamayan at maging maayos ang mga pamayanan sa lungsod, paliwanag ni Eleazar.

    Kadalasan ay pinagmumulta, pinag pupush-up o pinag-cocommunity service ang mga lumalabag sa ordinansa.

     

    BD Admin: You think your friends gonna like this piece? If you do, kindly share it. Thanks.

    No Comments "

    One-stop-shop para sa business permit itatayo sa Boracay

    August 1st, 2018

    Ni Santiago Celario

    DENR Secretary Roy Cimatu. Photo © https://en.wikipedia.org

    ISANG one-stop-shop ang itatayo ng Boracay Inter-Agency Task Force para sa mga kukuha ng mga kaukulang permiso na may kaugnayan sa pagnenegosyo sa nasabing isla.

    Ito ang napagalaman mula sa isang pahayag ng BIATF kamakailan na nagsabi rin na ang pagtatayo ng one-stop-shop ay ayon na rin sa isang direktiba na ipinalabas ni Pangulong Rodrigo Duterte.

    Ayon kay BIATF chair Roy Cimatu, maglalagay ng mga tao ang mga Department of Environment and Natural Resources, Tourism at Interior and Local Government sa one-stop-shop para mapadali ang proseso ng pagkuha ng mga kaukulang permiso.

    Bukod sa pagbibigay permiso, gagawa rin ng beripikasyon ang DENR kaugnay sa kalalagayan at klasipikasyon ng mga lupa na kinatitirikan ng mga establisimyento sa pamosong isla.

    Idinagdag ni Cimatu na lahat ng ito ay tulong ng pamahalaan sa mga may-ari ng negosyo na magpoproseso ng mga requirements para makapag-operate ang kanilang negosyo sa sandaling magbukas ang Boracay sa mga turista sa October 26.

    Kasabay nito, nanawagan din si Cimatu sa lahat ng mga negosyante na may negosyo sa Boracay na kumuha ng kinakailangang permits, lisensya o certification, dahil kung hindi ay mananatiling sarado ang kanilang negosyo.

    The reopening of Boracay does not mean that all establishments will also reopen. They will have to first secure the necessary permits and comply with existing conditions or requirements,” diin ni Cimatu.

    Ang BIATF ay binuo ni Pangulong Duterte para isulong ang rehabilitasyon sa isla ng Boracay matapos ang problema sa kalikasan sa naturang isla.

    Kaugnay nito nagtalaga na din ang DENR Environmental Management Bureau (EMB) ng kanilang mga personnel para tumulong sa pag-evaluate ng compliance ng environmental laws, particular na ang malinis na tubig, malinis na hangin, solid waste management, at toxic substances at hazardous waste control.

     

    BD Admin: You think your friends gonna like this piece? If you do, kindly share it. Thanks.

    No Comments "

    Pangulong Duterte, hindi para sa buhay ng tao – KMP

    July 25th, 2018

    Ni Santiago Celario

    BINATIKOS ng Kilusang Magbubukid ng Pilipinas si Pangulong Rodrigo Duterte matapos sabihin nito na ang kanyang State of the Nation Address nitong nakaraang araw ng Lunes ay para sa “buhay ng tao.”

    Pinuna ng KMP na umaabot na sa 23,000 tao ang nasasawi dahil sa giyera ni Duterte kontra bawal na gamot. Ipinunto rin ng samahan ng mga magsasaka na daan-daan, kundi man libo, nang magsasaka ang nawalan ng masasakang lupa sa kanayunan dahil sa militarisasyon na ipinatutupad ng administrasyon, lalo na sa lugar ng mga Lumad.

    Ayon kay KMP Secretary General Antonio Flores, ang 48 minuto na SONA ni Duterte ay hindi nakaaaliw dahil wala itong magandang ipinangako sa mga magsasaka. Sinabi pa niya na ang tanging isinusulong ni Duterte ay ang Rice Tariffication, Land Use Act, TRAIN Law, TRAIN Package 2, ang hindi makatotohanang Coconut Farmers Trust Fund, Charter Change, Federalism at iba pa na walang kaugnayan sa problema ng mga magsasaka.

    Duterte is again promising to give Filipinos a comfortable life but what his policies brought to the people in the past two years are all hardships and suffering. Ang SONA ni Duterte ay anunsyo ng mga panibagong pahirap na patakaran,” diin ng KMP.

    KMP Secretary General Antonio Flores.

    Pinansin pa ni Flores na walang sinabi si Duterte tungkol sa land reform para sa mga magsasaka. Sa halip ang tinalakay niya ay ang pagnanais na pabilisin ang National Land Use Policy, na isa umanong institutionalized legislative proposal para sa massive land use conversion.

    Idinagdag pa ng KMP na bagamat may matinding panawagan na ibasura na ang Train Law, ay nais pa rin ng Pangulo na isulong na ipatupad ng naturang tax measure na dahilan para lalong tumaas ang presyo ng mga pangunahing bilihin.

    (Read Morehttp://beyonddeadlines.com/2018/07/24/president-rodrigo-duterte-wont-budge-on-train-law-implementation/)

    Bukod dito ay sinabi rin ng KMP na bagamat binanggit ni Duterte ang tungkol sa coco levy fund at inutusan nito ang Kongreso na mag-convene ng bicameral conference para maipasa na ang coconut farmers trust fund bill, ay hindi naman suportado ng mga magsasaka ang kanyang proposal para sa paggamit ng coco levy dahil ito ay para umano nito sa privatization ng PhP75 bilyong coco levy fund.

     

    BD Admin: You think your friends gonna like this piece? If you do, kindly share it. Thanks.

    No Comments "

    Mga bata ginagamit ng sindikato ng bawal na gamot – PDEA

    July 19th, 2018

    Ni Santiago Celario

    Image © https://en.wikipedia.org

    NAGPAHAYAG ng pagkabahala ang Philippine Drug Enforcement Agency dahil sa pabata nang pabata ang mga nahuhuli nilang sangkot sa paglalako ng bawal na gamot.

    Ayon kay PDEA Director General Aaron N. Aquino sa isang pulong balitaan kamakailan, may mga nahuhuli na silang mga menor de edad na mula tatlo hanggang 17 ang gulang na nagtutulak ng droga. Idinagdag niya na ginagamit ng mga sindikato ang mga kabataan dahil alam nilang hindi maparurusahan ang mga ito.

    Bunsod nito ay patuloy na iginigiit ng PDEA sa Department of Education (DEPED) ang pagkakaroon ng mandatory drug test sa lahat ng secondary school at maging sa college student upang makatulong sa pagsawata ng illegal drugs sa hanay ng mga kabataan. Idinagdag pa ni Aquino na maging sa college student ay ipinanunukala niya ang pagsasagawa ng mandatory drug testing.

    Sinabi pa ni Aquino na gumagawa nang hakbang ang PDEA katulong ang ibang ahensya ng pamahalaan para matigil ang paggamit ng mga sindikato sa mga kabataan sa kanilang illegal na gawain.

    Samantala, nagkaroon ng Memorandum of Agreement ang PDEA, Maritime Industry Authority (MARINA) at Philippine Coast Guard upang lalong mapagibayo ang kampanya ng pamahalaan laban sa bawal na gamot.

     

    BD Admin: You think your friends gonna like this piece? If you do, kindly share it. Thanks.

    No Comments "

    Masinsing paglilinis sa Quezon City Jail ipinagutos

    July 17th, 2018

    Ni Santiago Celario

    (File photo) Inmates of the Quezon City Jail 2016. Photo © Youtube.com

    IPINAGUTOS ng pamunuan ng Bureau of Jail Management and Penology ang masinop na paglilinis ng Quezon City Jail upang hindi bahain ang loob ng detention facility dahil sa nagkalat na basura.

    Ang kautusan ay ipinalabas nitong Martes matapos mamatay ang isang detainee kamakailan dahil umano sa leptospirosis na kanyang nakuha matapos lumusong sa baha sa loob ng QCJ.

    Ayon kay Bureau of Jail Management and Penology (BJMP) Spokesperson Senior Inspector Xavier Solda, hindi titigilan ang gagawing paglilinis sa loob ng piitan. Sinabi pa niya na ito ay bahagi na rin nang paghahanda ng BJMP sa mabilis na paparating na tag-ulan upang maiwasan ang pagputok ng sakit, tulad ng leptospirosis, sa hanay ng 3,891 detainees ng QCJ.

    Ang QCJ ay itinayo para lamang bahayan ang 800 detainee. Sa kasalukuyan, ang QCJ ang isa sa pinaka-congested na detention facility sa bansa.

    Sa kabilang banda, kinilala lamang ng pamunuan ng BJMP ang nasawing detainee sa pangalang Mark, 29. Si Mark ay namatay noong ika-23 ng Hunyo sa East Avenue Medical Center kung saan siya isinugod matapos magpakita ng sintomas ng hinihinalang leptospirosis.

    Bukod dito ay napag-alaman pa na may isang uri ng acute chronic disease ang biktima.

     

    BD Admin: You think your friends gonna like this story/opinion? If you do, kindly share it. Thanks.

     

    No Comments "

    Koreano arestado sa CIA dahil sa droga

    July 16th, 2018

    Ni Santiago Celario

    Clark International Airport. Photo by conceptnewscentral.com

    INARESTO ng mga awtoridad ang isang Koreano matapos umano itong mahulihan ng bawal na gamot at illegal na revolver sa loob ng Clark International Airport nitong nagdaang Martes, ayon sa isang nahuling ulat ngayong Lunes.

    Kinilala ni Philippine Drug Enforcement Agency (PDEA) Director General Aaron N. Aquino ang dinakip bilang si Hoseop Yoon, 61 years old. Nakumpiska mula sa kanya ang walong gramo ng pinaghihinalaang methamphetamine hydrochloride o shabu na may tinatayang street value na aabot sa PhP54,400, at isang kalibre ,22 na revolver.

    Ayon kay Aquino dakong alas 12:20 ng tanghali nang hulihin ang suspek nang magsagawa ng interdiction operation ang mga pinagsanib na elemento ng PDEA Regional Office III (PDEA RO III) sa ilalim ni Director Gil T. Pabilona at Philippine National Police Aviation Security Group (PNP-AVSEGROUP) sa CIA matapos makatanggap ng impormasyon ang mga awtoridad tungkol kay Yoon.

    Nakapiit ngayon ang suspek, at nahaharap sa kasong paglabag ng Section 11 (Possession of Dangerous Drugs), Article II ng Republic Act 9165, o mas kilala sa the Comprehensive Dangerous Drugs Act of 2002.

    Kasabay nito ay sinampahan din si Yoon ng kaso dahil sa paglabag sa Republic Act 10591 (Comprehensive Law on Firearms and Ammunition Act).

     

    BD Admin: You think your friends gonna like this story/opinion? If you do, kindly share it. Thanks.

    No Comments "