Mel Vera Cruz, Sining at Spirituality

Ni Vics Magsaysay, Buhay Amerika

Artist Mel Vera Cruz

ANG sining ba puwedeng gawing behikulo patungo sa ating pagiging spiritual?

Posible. May mga libro ngang nagsasaad nito. Isa na itong “The Artist’s Way” ni Julia Cameron, na tinatalakay ang kaugnayan ng ating artistic creativity at ang spiritual connection sa Diyos.

Nabanggit din nga ni Anton Chekhov, isang manunulat na Ruso, na kung gusto mo raw ayusin ang iyong sining, kailangan munang ayusin mo ang iyong buhay. Kaya tuloy hindi makakaila na may malalim na connection ang dalawa – sining at ating buhay.

Maganda ngang pakinggan ang mga ito, pero sabi nga sa Ingles, “The proof of the pudding is in the eating.

Askal

Si Mel Vera Cruz, taga-Bay Area sa Hilagang California, ay isang miyembro ng “Banggaan Artist Group, isang informal na internet group na kinabibilangan ng mga artist sa iba’t ibang dako ng mundo. Kasama rin dito sa Amerika ang sikat na artist na si Rodolfo Samonte, Lynda A. N. Reyes, Zen Lopez, Melissa Nolledo at ang inyong lingkod.

Minsan, nakapanayam ko si Mel. Maraming taon na din na kami’y ‘di nagkakausap. Hindi ko inaasahan ang kanyang malaking pagbabago. Na-intriga tuloy ako, nagtanong at nakinig sa kanyang mga salaysayin na kapupulutan ng magandang aral.

“Nuong mga ’90s, nakahiligan kong magpinta ng mga istilo nina Monet at Picasso, pero nuong mga 2002, binago ko na ang aking style,” banggit ng 54 na taong artist.

“Para akong isang instrumento ng musika na kailangang palaging nasa tono. Para magawa ito kinakailangang ko na mag-isa para makapunta sa aking “sentro,” at nang sa gayon ay maging maliwanag ang aking isipan,” sabi ni Mel.

“Sakit kasi sa tenga kapag ‘disintunado’,” dagdag pa niya.

Best buddy

Si Mel ay parang isang alkemiko: nanduon iyong isang bagay na wala ng silbi sa atin pero nabibigyan niya ng bagong buhay ang mga ito sa kanyang mga obra.

“Sa halip na basura, ‘ika nga, ito’y nagiging art pa. Sayang kasi,” pahayag niya.

Ang mga materyal, tulad ng Mylar, isang uri ng manipis na plastik, na itinatapon na sa kanyang pinagtatrabahuhan ay nagagamit niyang pinaka-canvas sa pagpinta.

“Kaya ang sining ay hindi nalalayo sa aking pinagtatrabahuhan,” paliwanag ni Mel.

“Sa halip na bumili ng canvas sa art supply, sa Home Depot na lang, at aking binibili iyong drop cloth canvas,” explika ni Mel. Siya kasi ay isang artist na hindi marunong sumunod sa mga dikta ng tradition. Ganuon din na hindi na raw kailangang i-validate pa ang kanyang obra. Para sa kanya, mas mainam sa artist ay iyong maglakad sa hindi pa nalalakarang daan.

Tulad din ng mga sinasabi ng mga guru, “Napakahalaga sa akin na maging mindful sa lahat ng bagay. Sama na rin iyong tahimik ang isipan. Kaya kung wala kang mental strength, wala kang physical strength rin. Ang sining ay naririyan upang mabigyan natin ng inspirasyon ang mga susunod pang henerasyon upang sila’y maging matahimik at creative,” lahad ng pintor.

Naungkat rin ni Mel ang pagiging payak o simple. Nawawala na rin sa kanya ang kinang ng mga materyal na bagay. Ang makahulugan ang ay kung ano ang nagiging malapit sa kanyang puso, at hindi ang ego.

“Tayo ay hindi nalalayo sa puno. Isa lang ang ating pinanggalingan – nagkakasanga, kumakalat at yumayabong,” dagdag ni Mel.

Si Mel ay naimpluwensiya ng Kwatro Kantos, isang art collective sa Bay Area ng Northern California. Sa grupong ito, gumagawa sila ng obra hindi para i-glorify ang kanilang sarili kundi makabigay ng inspirasyon sa bagong henerasyon.

Ang butihing maybahay ni Mel, si Millette, ay malaking tulong din sa kanyang paglalakbay sa landasing kanyang tinatahak. Malaki ang paniniwala niya na soulmate niya ang asawa.

“Si Millette ay ang pinakaunang judge ko kapag may ginagawa akong obra. Magaling siyang humatol kung ano man ang magiging reaction ng audience,” kuwento ni Mel. Nagbunga ang pagsasama nila ng dalawang anak – ang 13 anyos na si Miro at 10 anyos na si Isabela, parehong kapansin-pansin ang hilig sa sining.

Isang madiing sinasabi ni Mel: “Kailangang maging totoo tayo sa sarili.” Malaking coincidence nga na ang gitnang ngalan niya ay “Vera,” na ang ibig sabihin ay totoo. At kung tayo’y totoo nga naman, ang ating kamalayan ay aakyat ng mataas na antas sa ating spirituality. Ito’y hindi na natin kailangang ipaalam sa iba, makikita na nila ang “proof of the pudding,” ang resulta o katibayan.

Kung tutuusin, sa sining man o ano mang gawain, magandang pakinggan ang katutubong kasabihang ito: “Kung tayo’y tumanda, dapat mayroon tayong pinagkatandaan.”

 

 

BD Admin: You think your friends gonna like this piece? If you do, kindly share it. Thanks.

One Comment

  1. Great read. Love Mel’s work!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.