Opinions

Mahalaga ang respeto*

SA lahat ng pagkakataon ay huwag sana natin kalilimutan ang kahalagahan ng pagkakaroon ng respeto sa ating kapwa tao. 

Noong isang linggo lamang ay lumutang ang retiradong pulis ng Davao City na si SPO3 Arthur Lascañas sa Senado para magbitiw ng mga hindi kanais-nais na pahayag laban sa Pangulo. 

Kung noong Oktubre ay nagpahayag siya sa Senado na hindi totoo ang Davao Death Squad (DDS), ngayon ay taliwas na ang sinasabi ni Lascañas. Kabilang daw siya sa DDS at idinawit pa si President Duterte na nag-utos umano kung sino ang kanilang magiging target at papaslangin. 

Kasunod ng pagsisiwalat ng dating pulis ay nagpahayag si Presidential Communications Secretary Martin Andanar na napag-alaman daw niya na may ilang mamamahayag ang nabigyan ng $1,000 para mag-cover ng press conference ni Lascañas. 

Dahil lubhang nakaiinsulto ay tahasang itinanggi ng mga mamamahayag na nakatalaga sa Senado ang sinabing ito ni Andanar. Kinondena nila ang naturang opisyal ng Malacañang sa pagbibitiw ng pahayag na iresponsable at wala umanong pinagbabatayan. 

Sa katunayan ay hinamon pa nila ang kalihim ng Gabinete na patunayan ang kanyang sinabi. Kung hindi ito magagawa ni Andanar, ang nais ng mga mamamahayag ay humingi siya ng paumanhin sa kanyang sinabi. 

Batid ng Firing Line na dahil bahagi siya ng Gabinete, tumutupad lang si Andanar sa kanyang tungkulin na ipagtanggol si Duterte bilang isa sa mga galamay ng Pangulo. 

Pero ang pagbibitiw ng pahayag na makasasakit ng damdamin at nakaiinsulto sa kapwa ay hindi karapat-dapat, kung wala nga itong basehan. 

Ang puna ng iba ay maaaring nakalimutan na ni Andanar na bagaman isang opisyal na siya ng Malacañang, ay dati rin siyang naging mamamahayag at bahagi ng media. 

Nauunawaan ni National Press Club (NPC) president Paul Gutierrez ang sentimiyento ng kanyang mga kabaro dahil nagko-cover din siya sa Senado. Batid niya ang mahigpit na pagsunod sa “journalist code of ethics” na ipinatutupad ng mga mamamahayag doon. 

Bunga nito ay nakikiisa si Gutierrez sa pagkondena ng Senate reporters sa pahayag ni Andanar at tinawag pa itong “iresponsable.” 

Sa kahit ano pang antas ng buhay mayroon tayo, mayaman o mahirap, opisyal ng bansa o tao na walang trabaho, ay napakahalaga na magkaroon ng respeto sa pagitan ng bawat isa. 

Dapat pag-ingatan natin ang pagbibitiw ng mga negatibong salita sa ating kapwa dahil dumating man ang pagkakataon na bawiin natin ito, ay hindi mababago ang katotohanan na ito ay nasabi na at nasaktan na ang kalooban ng ibang tao bunga nito. 

*              *              * 

SHORT BURSTS. Para sa mga komento o reaksiyon, mag-email sa firingline@ymail.com o mag-tweet sa @Side_View.

*Ang mga pananaw sa artikulong ito ay sa sumulat.  Maaring hindi ito ang opisyal na posisyon ng Beyond Deadlines.

Robert Roque Jr.
Robert B. Roque Jr. is a veteran journalist who started out as a correspondent for Manila Bulletin's tabloid TEMPO in 1983. In 1989, At age 27, he rose to become the youngest associate editor of a newspaper of national circulation. In mid-2000, he took the helm of the paper as its editor until his voluntary retirement in 2012. He currently writes a syndicated column for TEMPO, Remate, and Hataw newspapers, and for this site, Beyond Deadlines. A former journalism lecturer at the Faculty of Arts and Letters of the University of Santo Tomas from 1992 to 2002, Roque is also an active member of the Lions Clubs International, the largest service club organization in the world, having served as head of the Philippine Lions (council chairperson) in Lion Year 2011-2012.

One Reply to “Mahalaga ang respeto*

  1. Kapag ang isang opisyal lokal man o nasyonal ay hindi marunong dumama ng damdamin,asahan mong ito ay hindi magiging mabuting lider

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.